గట్టి పోటీకి సిద్ధమవుతోన్న టాటా మోటార్స్

భారతీయ ఆటోమొబైల్ సంస్థ టాటా మోటార్స్ సరికొత్త మల్టీపర్పస్ వెహికల్ టాటా ఇండిక్రూజ్ ఎప్పుడు వస్తుందోనని అందరూ ఆశక్తిగా ఎదురుచూస్తున్నారు. టయోటా ఇన్నోవా, చెవ్రోలెట్ టవేరా, మహీంద్రా గ్జిలో వాహనాలకు పోటీగా టాటా మోటార్స్ రూపొందించిన టాటా ఇండిక్రూజ్ ఈ ఏడాదిలో మార్కెట్ లోకి రానుందని టాటా కంపెనీ గత సంవత్సరం ప్రకటించారు.

టాటా సఫారీ లాంటి మల్టీపర్పస్ వెహికల్ గ్రాండ్ సక్సెస్ తర్వాత రాబోతున్న ఈ కారు మీద మంచి అంచనాలే వున్నాయి. టాటా సఫారీకి ఉపయోగించిన 2.2 లీటర్ డైకోర్ డీజిల్ ఇంజన్ నే ఈ వాహనానికి కూడా ఉపయోగించారు. ఏడుగురు సౌకర్యంగా కూర్చోడానికి వీలుగా ఈ కారును డిజైన్ చేసారు. కాగా ఈ ఏడాది జూన్ లో ఈ కారు వినియోగదారుడికి అందుబాటులోకి వస్తుందని తొలుత అందరూ భావించినా ఇంకా కారు విడుదల గురించి టాటా మోటార్స్ ఎలాంటి ప్రకటన చెయ్యకపోవడంతో అసలు ఈ కారు ఈ ఏడాది విడులకానుందా లేదా అనే అనుమానాలు తలెత్తుతున్నాయి. ఏదెలా వున్నా ఈ కారు విడుదలయితే మిగితా కంపెనీల వారికి ఇబ్బందే అనడంలో అతిశయోక్తి లేదు.